Saturday, August 12, 2017

వెర్రి అభిమానం!!!


ఈ మధ్య నాకు తెలిసిన ఇద్దరు పిచ్చాపాటిగా వర్తమాన విషయాలపై వాదోపవాదాలు చేసుకుంటుండగా వినటం జరిగింది. అందులో ఒకతని వాదన సారాంశం ఇలా ఉంది.
“ఆ నాయకుడిని ఉరికే ఇన్ని కోట్ల జనం అతనికి మద్దతు పలికి, ఓట్లు వేయరు కదా! అతని ఉపన్యాసాలకు జనం ఎలా వస్తారో చూసావా? అతను ఒక మేధావి. అతన్ని ఒక పల్లెత్తు మాట అన్నా నేను సహించను”

సామాజిక మాధ్యమాల పుణ్యమా అని, ఈ మధ్య ఈ రకం వాదన మాట్లాడేవాళ్ళు ఎక్కువయ్యారు. ఒక వ్యక్తికి కొన్ని కోట్ల మందిని ఆకర్షించగల సమ్మోహనా శక్తీ ఉన్నంత మాత్రాన, ప్రజలు ఆ వ్యక్తికి మద్దతు పలికినంత మాత్రాన ఆ వ్యక్తి ఏం చెప్పినా, ఏం చేసినా నిజం కావాల్సిన అవసరం లేదు మరియు దానికి ఆ వ్యక్తి మేధావి అని రుజువూ కాదు!!  ఎందుకు కాదో చెప్పటానికే నా ఈ చిన్ని కథ.

బ్రిటిష్ వారు బారతదేశంలో వారి సామ్రాజ్యాన్ని విస్తరిస్తున్న రోజులవి. ఒక మారుమూల ప్రాతంలో ఒక చిన్న గ్రామం ఉండేది. వాళ్ళందరూ అడవిపైనే ఆధారపడి జీవించేవాళ్ళు. ఆ గ్రామంలో ఒక పెద్దమనిషి ఉండేవాడు. అతనంటే గ్రామస్తులందరికీ అభిమానం. గ్రామానికి అతనే దిక్కు అన్నట్లు ఉండేవారు.

బ్రిటీషువారికి ఆ గ్రామా చుట్టుపక్కల అడవిలో దొరుకుతున్నసహజవనరులపై కన్ను పడింది. ఈ గ్రామం వారికి, బ్రిటీషు వారు వచ్చి, తాము దైవంలా కొలుస్తున్న సహజ వనరులను కబలిస్తుండటం నచ్చలేదు. కొంత మంది గ్రామస్తులు బ్రిటిషు సైనికులతో ఘర్షణ పడ్డారు కూడా. కాని వారి తుపాకుల ముదు వీరి విల్లులు ఏమి చేయలేకపోయాయి.

ఆ ఊరి పెద్దమనిషి దగ్గరికి ఆ గ్రామస్తులు వచ్చి సలహా అడిగారు. ఆ పెద్దాయన, సరే నాకు ఒక వారం సమయం ఇవ్వండి ఏదో ఒక మార్గం చెబుతాను అని చెప్పి ఎక్కడికో వెళ్ళిపోయాడు. వారం తరువాత వచ్చి, అ గ్రామస్తులందరినీ పిలిచి ఇలా చెప్పాడు

“నేను ఆ పర్వతం పై ఉన్న యోగి బాబా సహాయం తో యాగం చేసి ఈ మంత్రించిన నీళ్ళను తీసుకువచ్చాను. ఈ నీళ్ళను మనం త్రాగిన తరువాత ఆ తెల్ల వాళ్ళ ఆయుదాల నుంచి వచ్చే మందు గోళాలు పువ్వులుగా మారిపోతాయ్. కాని మనం అందరం కలిసికట్టుగా ఈ నీళ్ళను త్రాగి పోరాడితేనే వాళ్ళను ఓడించగలము”

తుపాకుల గురించి మొత్తంగా తెలియని ఆ గ్రామస్తులు, ఆ పెద్దమనిషి పై ఉన్న నమ్మకం మరియు అభిమానం తో అతనితో కలిసి ఆ మంత్రించిన నీళ్ళు త్రాగి పోరాడటానికి సిద్దం అయ్యారు. మరుసటి రాజు బ్రిటిషు వారి క్యాంపుపై దాడి చేయటం, ప్రతిగా బ్రిటీషు వారు తుపాకులతో ఆ గ్రామస్తులను కాల్చటం. ఆ పెద్దాయన తో పాటు మిగిలిన ఆ గ్రామస్తులు కూడా చనిపోయారు.


ఒక వ్యక్తి మీద ఉన్న అభిమానం మన విశ్లేషణా సామర్థ్యాన్ని నిర్వీర్యం చేయకూడదు. సామాజిక మాధ్యమాల ప్రకటనలకు, సామాజిక ఒత్తిడిలకు మరియు వెర్రి అభిమానానికి మనలో ఉన్న హేతుబద్దత అతీతంగా ఉన్నప్పుడే సమాజం సౌబాగ్యంగా ఉండగలుగుతుంది.  

No comments:

Post a Comment